المحاججة – أبجديات المناظرة

ياسين الزويك

مدرب مناظرات
مؤسسة الحوار والمناظرة
الزاوية

إيمان إسماعيل

مدربة مناظرات
مؤسسة الحوار والمناظرة
مصراتة

لو كنّا بنعطوك “اللُّب” في المناظرة، حنقولولك خود المحاججة ⚔

المحاججة هي جوهر المناظرة واللي تقوم لأجله، وهي الوسيلة اللي حتأدّي للاقتناع والفوز أو الخسارة، ولو بنعرّفوها: “هي تقنية من تقنيات الخطاب، تستخدم البرهان كي تؤدي بالأذهان إلى التسليم بما يعرض عليها”، والغاية منّه هي الوصول إلى الصواب، وهذا يؤدي إلى إنشاء اعتقاد جديد، أو تغيير اعتقاد سابق، أو تعزيزه.

تتكوّن المحاججة من ركنين، وحدة تمثّل الهجوم والأخرى الدفاع، ولازم تتقنهم الزوز باش تكون مُناظر جيّد.

1️⃣ الحجج البنائية: هي كل ما يثبت به المناظر دعواه ويغلب به خصمه، ولو بنبسّطوها، هي باختصار الأسباب اللي تخلّيك توالي أو تعارض القضيّة، وتتكوّن من الآتي:

📍 التوكيد: وهو عنوان الحجّة (الادّعاء).

📍 التفسير: توضيح للادعاء وشرحه لإثبات صحّته (وهذا أهم جزء من الحجّة).

📍 التدليل: أدلّة معينة يستند عليها تفسيرك.

📍 الإسناد: ربط الحجّة مع موقفك الكلّي وتوضيح كيف تدعمه.

2️⃣ الحجج المضادّة (التفنيد): هو ردّك على حجج الخصم، وتوضيح الأسباب اللي تخلّيها باطلة أو غير صحيحة، من الأسباب هذي:

📍 اللا علائقيّة: الحجج المقدَّمة ما ليهاش علاقة قوية بالموضوع محل نقاش.

📍 اللا أهميّة: الحجج ما ليهاش أهميّة كبيرة وأثر في القضيّة.

📍 عدم دقّة الحقائق: المعلومات المعطاة غير صحيحة.

📍 التناقض: أن المتحدّث يقول كلام بعدين يقول عكسه أو يفنّده من غير ما يحس، أو يقول كلام ينافي كلام زميله في الفريق.

لاحظ أنَّ مش كل ما يقوله الخصم بالضرورة يُفنّد؛ بعض الحقائق من غير الممكن إنكارها فما تفنّدش لأجل التفنيد، تقدر بدلًا عن ذلك تفكّر فيما تعنيه الحجّة الصحيحة في سياق آخر وتفنّدها بطريقة “هذا صحيح، ولكن…”

في التعليقات، قوللنا من أحسن حد تعرفه يعطي حجج ويفنّد؟ 😎🔥