تدريب إلكتروني بمشاركة وطنية

ماكنتش نتصوّر أنّه بعد ما تدربت في منصة حصة، حنقدر نشارك في أكبر بطولة في ليبيا!

إسمي عبدالباسط الزياني وحنحكيلكم قصّتي مع حصّة

في أول الحكاية، تم الإعلان عن تدريب (أساسيات المناظرة) في مدينتي (سرت) ونزّلت مؤسسة الحوار والمناظرة رابط وكان لازم نسجل فيه لو نبي نشارك

بس للأسف ما كنتش فاهم المناظرة بشكل كبير وما عندي عليها أي معلومة نهائيا وكنت نعتقد أنه حيكون تدريب عادي ومافيش هذيكا الفوائد الكبرى بس بحكم كنت مافيش قراية وقتها وراحة ونبي تجربة جديدة كنت حندخل نجرب وخلاص نشوف الوضع شنو

بس هذيكا فترة ما كنتش متفرغ او متواجد بشكل كبير يعني وصارن شوية التزامات منعوني من التدريب

قلت يلّا! الله غالب تتعوض إن شاء الله في تدريب آخر

كنت نشوف في أصدقائي داخلين لعالم المناظرة واخذين تدريب وكانت تربطني بيهم علاقة قوية يعني قبل حتى المناظرة بحكم سرت صغيرة ونعرفوا بعض الأغلب من سنوات

وكان عندي صديق الله يذكره بالخير يلح علي ويبيني ندخل لعالم مناظرة ونتعلم

بس طبعاً التدريب وفاتني! قلت يمكن يديروا تدريب ثاني وخلاص ونستفيد منا وكانوا هذيكا فترة يدربوا بشكل مستمر

طبعاً ما كنت ناوي ولا نفكر اني نشارك في بطولة ولا خطرت في بالي عبارة عن تدريب ونحاول نستفيد منا وتمت يعني ما توقعتش عالم المناظرة كبير بالشكل هذا!

بعد شهر تقريباً من انتهاء تدريب ف مدينتي يراسلني نفس الصديق الي كان يلح علي ويقولي ادخل للمناظرة ويقولي لو مزال تبي تدخل لعالم مناظرة عندك فرصة

للامانة قلت هي خليني نجرب ونشوف الجو، فـ طلب مني نتواصل مع أحد الزملاء وقال لي تو يوضحلك قصة التدريب شنو

توقعت ان تدريب واقعي ثاني وهكي.. ف لما تواصلت معاه قالي في منصة تعليمية خاصة بي تعليم اساسيات مناظرة وتقدر تاخذ منها تدريب وتكون كأنك واخذ تدريب أساسيات معانا

قتله: كيف يعني شن قصدك لو تدربت عل منصة وسجلت وتميت تدريب نقدر نكون منخرط معاكم في المجال؟ قالي ايه!

دلني عل منصة اسمها #منصة_حصة وهي كانت بدايتي وأساسي في عالم المناظرة.

فالبداية قلت: تدريب إلكتروني ومش واقعي واستفادة مستحيل تكون كيف الواقعي ومستحيل يعني نكون بنفس خبرتهم هذيكا فترة وحسيت ان مش حيعجبني لاني من صعب نعجب بي شي

ف قلت هي نشوف اول درس لما سجلت وللأمانة من أول درس واني نستمر ونكمل ونكمل جذبني الشرح والاسلوب والحرفية اللي كانت في الإعداد للتدريب اكثر من التدريب نفسه, مجهودات جبارة

كملت التدريب بالكامل وبدون أي ملل او تقطيع ولقيت روحي درجة درجة لين كملت تدريب

كملت التدريب وقلت مش حنكون كيف الي واخذين تدريب واقعي بس مشيت في نفس اليوم اللي كملت فيه وشفت شباب داروا مناظرة وكانت أول مرة نشوف مناظرة واقعية قدامي وعجبوني الشباب والمستوى متاعهم وقلت زعمك اني نقدر ندير زيهم؟

فعلا من اول تجربة لي هذيكا الفترة ومن بعد متابعة بسيطة وفهم المواضيع الي خذيتهم في المنصة بتعمق لقيت أموري تمام ونقدر نناظر!

وفعلا بعدها بأيام ناظرت اول مناظرة واقعية لي وكان خطابي 5 دقائق تقريبا وكان أداء يشكروا فيه المدربين بحكم كونها أول مرة نناظر وقالولي: استمر وحتشوف روحك

فعلا بعد استمريت وزدت تعمقت في تدريبات مع الكوتش الّي دربني لقيت روحي فعلا متفوق حتى على أغلب الشباب الّي واخذين تدريب واقعي؛ ومنصة حصة كانت العامل الأساسي الّي خلاني ندخل لعالم مناظرة

بعد عدة مناظرات اونلاين وجو هكي قرب وقت بطولة ومزال حاس روحي كنت مش حاجة والشباب الي معاي أفضل وفاهمين ومدن أخرى متميزين وخبرة وكلهم تدريبات ومتعمقين.

بعد تحفيز وتشجيع من زملائي ومن المدربين لقيت روحي نقدر نكسر حاجز الرهبة وقلت حنكون كيف أي شخص تدرّب واقعي وأفضل فعلاً بدأت هذيكا الفترة خايف والفِرق كلها قوية واني مش حنكون في مستوى

ف لما بدأت في استعداد وفي مناظرتي الأولى في البطولة لقيت روحي نقدر نكون كيفهم وأفضل ومستويات متقاربة بشكل كبير! وما كانش فيه الفارق الي توقعته، بالعكس كنت حتى الّي واخذين تدريب واقعي ومتعمقين في مناظرة نقدر نتفوق عليهم ونكون في مستواهم

وفعلا كسرت حاجز الرهبة الّي يركب في كل ما بندخل مناظرة وحاجز إنّي بنخسر فريقي وقلت بنقدم افضل ما عندي مهما كان لأنه فيه فريق ومسؤولية وأمانة ومش حنخلي رهبة فرق ولا رهبة مستواي يخرب علي

فعلا راجعت واذكرت كل الأساسيات وكل المعلومات المهمة الّي استفدت منها من #منصة_حصة بالإضافة إلى تدريبات مع شباب والإنخراط في مجال لقيت روحي أموري تمام ونقدر نقوي من نفسي يعني مش شي الي معقد وصعب..

حسيت بالمتعة والانسجام وخصوصا ان العمل كان في فريق ومع زملاء ونصائح وتشجيع… ولقيت الأمور ماشية وقدرنا نوصلوا لـ ربع النهائي وقدمت وقدمنا كذلك كفريق مجهودات مليحة يشهد ليها كل حكام وفرق الى ضدنا وكنا من الافرقة الي صنعت اسم وكانت مفاجأة البطولة

تجربة غيرت كثير في حياتي في فترة قصيرة من تجهيز واستعداد ولقيت روحي مشارك في بطولة ومع افرقة من ليبيا كلها أشياء لم تكن في الحسبان, كنت شي قبل المناظرة وحصة والتدريب

وبعد هذا كله شي اخر تمامًا

ننصح الجميع بدون استثناء أنهم يدخلوا لعالم المناظرة ويجربوا منصة حصة لانها حتنال الإعجاب

ونتحداك تجرب تدرب وما يعجبك الجو وما تبدء تبي تناظر وتولع فيك شرارة المناظرة

منصة حصة صنعت من شباب ما يعرفوا على المناظرة غير اسمها.. صنعت منهم متناظرين متميزين ينافسوا في بطولات وصنعت لهم المنصة هذي اسم

عارف روحي عطلت عليكم، إن شاء الله نشوفوا كل من ياخذ في تدريبات منصة حصة او تدريب واقعي زملاء ونشوفكم افضل حتى منا وتصنعوا قصتكم وتجربتكم الخاصة باذن الله